TE ANI NEI TE PUPU TE « AMUITAHIRAA HUIRAATIRA » IA PIA HIA TE MAU HIOPOARAA TEI RAVE HIA I NIA I TE FAATERERAA I TE OIRE O FAAA

Ua mai hia te Fenua no te aravihi ore o te tahi mau raatira rii o te taponi nei ia ratou i muri i ta ratou mau parau tuite ma te manao e e ravai teie parau tuite no te roaraa o to ratou oraraa rave ohipa.

Te hoe parau tuite, o te hoe parau teie te haapapu nei i to oe ite i nia i te hoe toroa no te faatereraa i te hoe ohipa. Teie nei ra hoi, aita teie parau tuite e haapapu mai nei i to oe aravihi no te faatereraa i te hoe ohipa.
Te aravihi, o te hoe ia mana taae i roto i te hoe taata no te haava i te hoe tapura ohipa e te vai nei tona ite hohonu, no te tapearaa mai i te vahi maitai anei aore ra te vahi ino anei no te tatairaa i muri mai.
E roaa mai teie ite hohonu na roto i te hoe faaohiparaa e te hiopoaraa no te hoe tau maoro i tona ite e te aravihi i te mau tapura ohipa atoa tei pupu hia atu i roto i tona na rima.

No te pupu te « AMUITAHIRAA HUIRAATIRA », rave rahi te mau raatira rii i te faatereraa o te Hau Fenua, i roto iho a ra i te mau piha toroa o te mau faatereraa hau, tei ore i faaohipa e tei ore i hiopoa i to ratou ite e te aravihi. E ite oioi hia teie mau raatira rii (te rahiraa o ratou) i nia i to ratou huru teoteo i roto iho a ra i ta ratou mau ohipa aore ra i roto i ta ratou mau pahonoraa i nia i te mau rave ohipa i raro ae i ta ratou faatereraa.

Teie iho a ia te pahonoraa i te aravihi ore o teie mau raatira rii no te haava e te haamaramaramaraa i te hoe tia porotita tei tihepu mai ia ratou.

Teie te mau ffi e ite hia anei i roto i te mau faatereraa Hau atoa o te Fenua nei, te mau faatereraa otonomi aore ra i te mau faatereraa o tei ani nei i te faataaeraa. Mai te peu e e aita te Peretiteni o te hau fenua e haapao i te parau no te ite e te aravihi, eita ia oia e manuia i roto i tona hinaaro no te haamauraa i te hoe porotita api no te iriti mai te Fenua na roto i te rima o te hoe pupu taata te imi nei i to ratou faanaoraa na mua roa.

Te porotita o te Hau fenua i roto i tona taatoaraa te mauhaa matamua roa no te tapearaa i teie mau taata aravihi ore, te tahi mau mero maiti hia na roto i ta ratou mau tihepuraa no te faafanaoraa i to ratou mau fetii na mua roa e te mau nominoraa a te tahi mau faatere hau ma te taua oreraa i te maitai o te taatoaraa.

Te mau titorotororaa o tei rave hia e te mau haava no te pae o te hiopoaraa i te faatereraa i te mau tapura faufaa a te mau oire o teie e haapapu mai nei ia tatou i te tahi mau fifi e ite hia nei na roto i te ite ore e te aravihi ore o te tahi mau raatira rii no te hoe piha toroa aore ra te tahi mau faatere no te mau pu tei roaa i te parau tuite aita ra e aravihi. Teie atoa te tahi haapapuraa ia tatou e e aita teie mau taata e taua mai nei ia tatou, te maitai iho a ra o te taatoa ra.

Te oire o Faaa te taipe no te mau haapapuraa a te pupu te « AMUITAHIRAA HUIRAATIRA » no te mea e rave rau matahiti to te tavana e te mau mero o tana apooraa oire rave noa raa i te moni a te Hau no te hoe faaohiparaa tano ore ma te faahapa ore hia e te tia no te ture.

Te ani nei te pupu te « AMUITAHIRAA HUIRAATIRA » i te tavana oire no Faaa na mua ae i te maitiraa no te hororaa oire i te pia i te taatoaraa o te mau titorotororaa o tei rave hia e te mau haava no te pae o te hiopoaraa i te faatereraa i te mau tapura faufaa a te mau oire i roto i ta ratou vea avae na te oire : « Te Fana ».

A AMUITAHI ANAE MAI E MANUIA TATOU
HINANO BESSALEM

TE FAANAHO ATU NEI TE PUPU TE « AMUITAHIRAA HUIRAATIRA » I « TE MAU FAAOTIRAA NO FAAA NUI ».

No te porotita tauiui a te tavana e tana mau mero apooraa oire, eita ia te parau no te parururaa i te hau i roto i te oire i te mea nahonaho.
Oia hoi, i mua i teie mau taurearea ohipa ore no Faaa, e piti tairaa reo to te tavana e tana mau mero apooraa oire. Te tairaa reo matamua oia hoi i te faahaparaa ia i te Hau i te purutiaraa ia ia tatou, e te piti o te tairaa reo i te aniraa ia i teie Hau i te tonoraa mai i te mau mutoi Farani no te parururaa i te hau.

Na hia ia teie mau mutoi, te faahapahia nei i te purutiaraa i to tatou nunaa i roto i te mau orero faataaeraa a te tavana e tana mau mero apooraa oire ? E oti anei ia ratou i te faanaho i te parau no te mau aroa fifi no Faaa ?
Te taia hia nei i te tomo i roto i teie mau aroa fifi. No te aha teie mau aroa i roo hia ai i te fifi ?
No te porotita te tumu, (aita e ohipa no te mea aita e parau tuite, aita e parau tuite no te mea aita e faanahoraa no te tururaa i teie mau tamarii, eita hoi te mau metua e nehenehe i te turu atu i ta ratou mau tamarii, i te rahiraa taime mea ite ae te mau tamarii i te mau metua, i te rahiraa taime e mau utua fare navai ore anae hoi) aita i faanaho atea hia te oraraa o te nunaa.
Te vahi maitai i te mau taurearea no te oire o Faaa, aita a te fifi i aifaito e te mau taurearea no Farani.

No te pupu te « AMUITAHIRAA HUIRAATIRA », te ravea matamua roa oia hoi te haamouraa i te hoe pu no teie mau taurearea no te faaanaanatae faahou ia ratou i nia i te parau no te mau ravea no te faanahoraa i to ratou ananahi (te mau haapiipiiraa toroa anei, te mau ravea anei no te imiraa i te ohipa anei, e rave rau anae).

No te pupu te « AMUITAHIRAA HUIRAATIRA » aita e parururaa no te hau i Faaa nei mai te mea aita te huiraatira, te mau mutoi oire, te mau mutoi farani, te mau tupoe auahi te tavana e tana mau mero apooraa oire e amui hia i roto i teie faanahoraa.

A amuitahi anae mai no te paruru i te hau i roto i to tatou oire. A haapae anae i te porotita no te faataaeraa a to tatou tavana oire e tana apooraa oire.

Te poroi nei te pupu te “AMUITAHIRAA HUIRAATIRA” i te tavana oire e tana mau mero apooraa oire ia tahoe i te mau pupu porotita atoa no Faaa, te huiraatira no te imi amuiraa i te mau ravea no te parururaa i te hau i Faaa nei, e o te mairi hia atu te ioa o te mau “FAAOTIRAA NO FAAA NUI”.

A AMUITAHI ANAE MAI E MANUIA TATOU
Te vahine,Hinano, te vahine Heimata

AITA I TE FAATITIRAA A TE TAVANA O FAAA I NIA I TE PARAU API

Te faahapa uana nei « Te Amuitahiraa Huiraatira », tapura te horo atoa nei no te maitiraa i te tavana no te oire o Faaa i te huru haapao ore no te tia o te ture i Porinetia Farani nei, tei vaiho noa tau matahiti i teie nei i te pu haapureroraa « Te Reo o Tefana »ia haapuroro no te hoe noa pupu porotita (« Te Tavini »), tei ofauhia nei e te moni a te nunaa.
Oia hoi tau hanere mirioni teie e faaohipa hia nei no te faatiani i te Porotita a te TAVINI i nia i te pu haapureroraa a “Te Reo o Tefana” eiata ra no te faafanao i te huiraatira navai ore no Faaa.
Te Hau Farani teie e faafaufaa ore nei i te Ture, (ta te mau haava hiopoa i te mau tapura faufaa a te mau oire i haapapu mai na roto i ta ratou mau maimiraa) te tuu atoa nei i teie huiraatira i roto i te fifi na roto i te parau faataaeraa a te pupu porotita Tavini teie e haapuroro hia nei i te mau mahana atoa.
Ua tuuhia te tahi hororaa. Aita e pahonoraa no roto mai i te tia no te Hau Farani, paruru atoa hoi i te tiaraa o te taata.
Ua faahapa hia na te ture te mau moni tauturu atoa ta te mau oire i horoa atu i roto i te hoe tomite.
I teie mahana, ua riro te Hau farani ei hoa paruru no te tavana oire no Faaa,e e Peretiteni atoa e tae noa atu i tona poheraa no te Tavini
Teie hoaraa i rotopu i te Hau farani e te parau faataaeraa a Oscar Temaru, o te hoe haamaniinoraa i nia i te tiaraa no te taata, teie ia e rave atoa hia nei i nia i te huiraatira no Faaa na roto i te titia oreraa hia te mau parau e haapurorohia nei.
Te ani nei te tapura « TE AMUITAHIRAA HUIRAATIRA » i te tia o te Hau Farani e e tia atoa no te Ture i to tatou nei Fenua, i te opani i te pu haapureroraa « Te Reo o Tefana » i teie hoa mahana teie e ofati nei i te papature tei haamouhia mai i te matahiti 1789, te irava ture numera 19 e te mau irava ture 10 e 14 no te papature no te mau Fenua Europa ma.

A AMUITAHI ANAE MAI E MANUIA TATOU

Maiti no te tapura a te mau « coucou », aore ra no te tapura a te UPLD i teie mau maitiraa e fa mai nei : te maitiraa ia no te hoe opuaraa faatereraa titi a Oscar TEMARU i Porinetia nei.

Ua fanao mai te mau rave ohipa a te hau i te hoe moni avae faahiahia a 40 matahiti i teie nei no te hiaai o te Hau i te hoe oraraa maitai i Porinetia nei mai te haamauraa hia mai te mau tamatamataraa atomi o tei haafifiroa i te faahoturaa fenua e te oraraa totiare i te fenua nei.
40 matahiti te fifi noa raa te imiraa faufaa, te fifi noa raa te oraraa totiare o tei haamou roa i te mau ravea no te faahoturaa i Porinetia Farani nei, i roto ihoa ra i te mau ohipa faapu, tautai, i roto atoa i te mau ohipa rima i, te ravai aore ra no te mau toroa no te mau taata tei aravihi i roto i ta ratou ohipa.
I Porinetia Farani nei, te faariro nei te hoe pae rahi o te mau aratai porotita anei, te mau raatira no te mau pu raveraa ohipa a te Hau anei, te mau fatu ohipa anei, i te maitai o te taatoaraa o te nunaa ei tapeapearaa i ta ratou mau opuaraa : « Te hoe oraraa fana’o aifaito ore ». Teie te mau tumu matamua roa e haapapu mai nei te oraraa porotita ta taou e ora nei i teie mau mahana mai te mauraa mai te papature no te Otonomi.
Te hoe Porinetia Otonomi, faaterehia e te hoe tia no te faataaeraa, aore ra na te mau aratai pupu porotita o tei rave i te tahi mau ohipa tano ore, tei riro mai ei porotita no te manuia oreraa te imiraa faufaa e te manuia oreraa te oraraa vaa mataeinaa.
Ua riro te mau pu faatere i te mau « Airaafaufaa » no te fenua nei mai te mau ofaaraa o te mau « coucou ».
E haere teie mau « coucou » e faahoa i te mau pupu porotita e te tahi mau taime e peta roa atu no te tapea noa raa i teie mau maitai ta ratou e fanao nei aore ra no te rave hope roa i to ratou mau hiaai aifaito ore ma te haapao ore i te maitai o te taatoaraa o te huiraatira.
Ua hamani teie mau « coucou » i to ratou mau nohoraa i roto i te faufaa o te fenua nei, pari atu ai i te tahi atu mau maohi i te rima toro noa, ma te hio oreraa e e te rahiraa o ratou, ua uana roa ia o to ratou mau fifi.
I teie mahana, te mai hia nei o Porinetia farani no tei mau rave ohipa na te Hau-Porotita e te rahiraa o ta ratou mau maitai e fanao nei.
Ua feruri maitai o Oscar Temaru, te tia e hiaai nei i te faataaeraa i taua tumu parau nei. Ua papu iana e no te manuia i te hororaa apooraa rahi i te matahiti 2004 i mairi ae nei, e titau hia oia i te faamoemoea i te rahiraa o te mau tino maiti, te mau tino maiti ihoara e e ere to ratou hoe a feruriraa e to te tia e hiaai nei te faataaeraa, haamau mai nei i te U.P.L.D, te taatiraa no te mau pupu porotita e hiaai nei i te faataaeraa e i te mau pupu no te otonomi.
Ua vaiho o Oscar Temaru i te mau « coucou » a Gaston Flosse ia haere mai i nia i tana tapura ma te ite atea e, e o Gaston Flosse anae te taata e nehenehe i te iriti atu ia ratou noa atu e e mau teuteu papu teie. Ua papu atoa ia Oscar e e te vai nei tei mau rave ohipa na te Hau-Porotita, te tahi mau fatu ohipa, te tahi mau vea e pee atu na muri iana no te mea aita ratou e hinaaro ia morohi e atu te mau maitai ta ratou e fanao nei.
Aita o Oscar i tauiui noa ae i tana porotita. Tona aravihi i nia i te tahua porotita raa oia ia i te horoaraa i te hoe hioraa nona mai te hoe peatara te huru, area ra te parau mau te faaohipa nei i tona aravihi no te mau pae atia ma. Te vahi papu ua ite o oscar i te hauti i nia i te tiaraa faaroo o te maohi no te tapae i te fa o tana e hiaai nei.
I te taeraa oia i nia i te faatereraa o te fenua, ua tuu mai oia i te mau taata faatere e aita earavihi e vai nei i roto ia ratou no te amoraa i teie mau tapura ohipa nei. Hoe hioraa oia hoi o Drollet tane, tei faatere mai i ta tatou faufaa, ma te rave mai i te feruriraa popaa oia hoi « te raveraa i te faufaa e fatu tona no te faafatu atu i te taatoaraa [le communisme] no tana tapura faufaa.
Te iriti maru noa ra o Oscar i te mau tia otonomi e i te mau tia e hiaai nei i te faataaeraa no te amo atu i tana mau hopoia. Ta tatou ia e ite nei, tei mua teie mau tia i te ture i teie nei. Aita te « Tavini » i roaa noa hia i teie mau viivii. I teie nei, te tono nei o Oscar te mau « coucou » tei toe mai i roto i teie pupu no ropu no te faaino noa a ia Gaston Flosse.
E ohipa maere tei tupu, na roto i te haamataraa te « Tahoeraa e te Tavini » i te taua parau. No te aha teie tauaraa parau ? No te mea ua ite Oscar e e o Gaston Flosse anae te taata e nehenehe e paruru i te huiraatira i nia i tana fa porotita no te mea tei muri noa a te Hau Farani ia Gaston Flosse no te tururaa i te otonomi e a amuri noa atu ma te turu mai i te pae o te faufaa.
Te hinaaro nei o Oscar Temaru ia topa to tatou fenua i roto i te veve no te haamau i te hoe oraraa titi mai te ora hia nei i temau fenua atia ma, ma te haapae i te faatereraa aifaito, o te faatereraa ia tana e rave nei i roto i te oire no Faaa.
Ia maiti anae outou no te tapura a te mau « coucou » aore ra no te UPLD i teie mau maitiraa e fa mai nei e maiti ia outou no te haamau mai i te faatereraa titi a Oscar Temaru i Porinetia nei.
HINANO

TE NUURAA RAHI TE MAU REO O TE TIAMARAA

I roto i te oire no Faaa, Pu no te tia o te titau nei te parau no te tiamaraa oia hoi o Oscar TEMARU, ua ite hia te nuu raa o te rahiraa reo o tei tia. Oia mau i te maitiraa o to tatou mau tia i roto i te hororaa tepute, ua ite hia te nuuraa rahi o te mau reo o te mau taata e hinaaro nei i te faataaeraa ia Porinetia e i te Hau Farani. Inaha hoi, ua matau noa tatou i te mau numera o to tatou tavana no Faaa, e piri atu tona mau rahiraa reo i te 8 tauatini i teie maitiraa nei ua roaa noa hia iana e 6.212 reo, area ra to te mau tia otonomi ua tae i nia i te faito reo 3 730, tau hanere reo api tei roaa mai i te mau tia otonomi.

Ia hio tatou i tei mau numera, e uiui te manao, no te aha te huiraatira no Faaa i ore maiti rahi faahou ai i to ratou tia no te faataaeraa ia Porinetia e o Farani ?
• Ua itehia anei te mau ohipa tano ore a te tavana oia hoi i te tapea noaraa te moni a te oire ma te faatupu ore i te parau no te faatupuraa i te imiraa faufaa, aore ra i te haaputunoaraa i te moni na te pu haapurerooraa « Te Reo o Tefana » (no te faaohiparaa teie pu no tana porotita) o ta tatou paatoa i ite i te faahaparaahia na te mau haava no te hiopoaraa i te mau tapura faufaa a te mau pu raveraa ohipa a te hau ?
• Aore ra te haamata anei te huiraatira no Faaa i te ite e e aita te tavana oire e te mau mero apooraaoire e huna nei i te parau tia ?

Oia, no te tautururaa i te oire no Faaa e tona huiraatira ia matara mai na roto i tei porotita tano ore, te titau hia nei i te pupu porotita « TE AMUITAHIRAA HUIRAATIRA » ia manuia mai i roto i te hororaa oire.
E aha ta tatou mau ravea ?
Te tomo haereraa i roto i te mau utuafare no te haamaramaramaraa i te huiraatira no Faaa i nia i te mau haavare a te tavana e te mau mero apooraa oire e rave rau matahiti i teie nei ( hoe hioraa, i te faaohiparaa i te moni a te oire no tana porotita).

« TE AMUITAHIRAA HUIRAATIRA », E pupu te faatupu i te hoe tiaturiraa aifaito ore, tei riro ei papa no te niu i te mau tauiuiraa i roto i te faatereraa o te oire no Faaa.

Te tiaturi papu nei o « TE AMUITAHIRAA HUIRAATIRA » i nia i te mau pupu, te mau taata atoa o te hiaai nei te parau no te otonomi i Faaa ia taati mai no te tururaa i teie tapura ohipa e no te faatupuraa i te hoe ohipa maere.

A AMUITAHI ANAE MAI E MANUIA TATOU

O VAI MA TE MAU TAVANA OIRE TEI HAHI E ATU E O TEI FAAUTUAHIA ?

O te tavana oire anae no Mahina oia hoi o Emile Vernaudon, peretiteni atoa no te pupu « Aia Api » te tia porotita o tei hahi e atu ?

Teie mai te tahi mau hioraa no te hahiraa o te tahi mau tia poritita o tei ore i faautuahia. Teie te tahi mau tapura faufa’a o tei hiopoahia e te mau haava no te mau faufaa e haamauaraa a te mau oire.

Te hioraa matamua :Te oire no Faaa
Te haapurororaa parau « Te Reo Tefana »
16 rave ohipa na te oire (9 o ratou e mau papai vea) o tei tuuhia atu i te pu haapurororaa parau « Te Reo o Tefana ». 45 mirioni o te haamauaraa no teie mau rave ohipa i te matahiti hoe tei tapura hia i nia i te tapura haamauaraa a te oire. I te matahiti 2002 ua naeroahia i te faito 120 mirioni te moni tauturu a te pu « Te Reo o Tefana ». E tano ia te uiraa i muri nei, e aha o tei faaohipahia i tei moni ?

Te hooraa mai i te tahi tapu fenua na te Oire
I te hooraahia mai te tapu fenua ra o « TAOTAHA », ( tei ofauhia 15,6 mirioni farani), aita hoe ae api parau na te pu raveraa ohipa no te pae o te fenua (DAF) no te horoaraa mai i te tahi mau faito moni no teie tapu fenua aore ra no te haapapuraa i te tino moni o teie tapu fenua. Te faahepo mai nei hoi te Papature na te mau oire (irava R.331-1 e tae atu i te irava R.311-4), i te mau api parau a te pu raveraa ohipa no te pae o te fenua i nia i te mau horo’araa moni no te hooraa mai i te tahi tapu fenua inaha hoi tei raro ae noa a te mau oire i te faatereraa à te Hau.

Te hioraa piti : Te oire no Pora Pora
Ua uana te mau haamauaraa i nia i te tamaaraa no te faariiraa i te mau manihini inaha hoi mai te mau matahiti 1999 e tae atu i te matahiti 2005 ua tatai piti te mau haamauaraa no te faariiraa, mai te 11 mirioni ua tae roa atu i te 22 mirioni. I te matahiti 2002, ua tae i te faito 28 mirioni e i te matahiti 2003, ua tapaeroa i te faito 35 mirioni.
E titau hia i te apooraa oire i te feruri maite i te mau tapura faufaa no te aufauraa i teie mau haamauaraa.

A AMUITAHI ANAE MAI, E MANUIA TATOU




asiasialarabi |
Rêve Vole Vers Un Nouveau M... |
Les vidéos chocs de l'actu |
Unblog.fr | Annuaire | Signaler un abus | collège jean lurçat (Ris-Or...
| ptitsreporters
| moiosu